♡囍♡ Vol.053 落訂喇！超級簡化版過大禮！

過大禮，過大禮，其實即係古時中式婚禮既落訂（訂婚），

古語云 “婚禮先以聘財為信” ，聘禮就係構成婚姻關係既首要條件喇！

先講下傳統過大禮⋯⋯

擇日？

而加有好多新人都會擇日過大禮，

日子大約係婚前4-6星期，過完大禮先派帖既。

新郎可否自己送禮及出現？

過大禮當日新娘同新郎本人都唔可以在場架，

送禮人可以搵兄弟團或者親人幫手，過完大禮男方先可以出現影相⋯

比幾多禮金？

禮金係男方同女方家長一齊傾，內容包括：

1. 禮金幾多？

2. 當日包唔包酒席人情？

3. 包既包幾多圍？

4. 女家買金器會預係禮金既幾多？

禮品要買幾多？

當中所有禮金、禮餅及禮品均需雙數，取成雙成對之意。

禮餅及禮品要分返一半比男家，所以一般人都係買4份，

但有好多人唔想講個4字，所以市面講買既份量係「2雙」。

係網上面刨左一輪傳統 vs 簡化版應該要點做，大家fyi

禮品大全（簡化版）：

1. 禮金：利是數字要大吉大利，聘金，飾金 －》冇得簡化

2. 八式海味：髮菜、鮑魚、蠔豉、元貝、冬菇、蝦米、魚翅、魚肚。－》髮菜、冬菇2雙

3. 四涼果：龍眼乾、荔枝乾、合桃乾、連殼花生 －》六種京果

4. 檳榔兩對：女家只收一個，寓意一郎到尾，或者收兩個，代表好事成雙－》買一對

5. 椰子兩對：寓意有爺有子﹝如果父母不全，買一對﹞－》冇得簡化

6. 生果三打：寓意生生猛猛，一打用黎回禮－》買一大籃

7. 三牲：生雞兩對，兩雄兩雌﹝如父母不全，買一對﹞－》「包羅萬有」利是取代

豬肉三至五斤，起雙飛﹝即一片相連開二﹞－》「包羅萬有」利是取代

魚：大魚或鯪魚，取其有腥﹝聲﹞氣。－》「包羅萬有」利是取代

8. 酒四支：洋酒或米酒 －》冇得簡化

9. 茶葉四罐，芝麻：茶葉係用種子種，有矢志不移之意，加芝麻代表油麻茶禮－》冇得簡化

10. 禮餅一擔（400個）： 嫁女餅由女家分，原意係話比人聽自己嫁女 簡化－》龍鳳餅2盒+唐餅1盒+餅卡

11. 帖盒（金盒）：蓮子、百合、扁柏、青褸兩對、芝麻、紅豆、綠豆、合桃乾、龍眼乾、

12. 龍鳳燭，紅繩、對聯（預女家上頭用） －》冇得簡化

注：以上數字有鮮粉色既都要分一半回返比男家，

係海味舖買個陣可以同老闆講聲分4袋袋裝，咁到時就唔駛自己分黎分去喇，

但都有人封「回禮大利是」取代所有⋯⋯

---------

好，講返我自己既過大禮喇！

同婚禮日子一樣，過大禮我地冇擇日子，

我媽係信主，之前共識左傳統禮節可以從簡，

對我黎講真係輕鬆至極呢！

但呢件喜慶事都要影下相，為左影相出黎得體，我都做左小小準備！

o係上面既傳統大禮入面，我地選左三樣～

1.禮金 6.果籃 10.餅卡

禮金

禮金我地會用支票，禮金當然要襯返靚禮金封喇！

呢個之前介紹過喇！成品好滿意呢！

係刺繡文字，內容可以全部自定，

33蚊人仔，雖然係訂做，但一日就出到貨喇！

果籃

一搵先知有幾多選擇，果籃，花菜籃，花藝果籃，花多眼亂呀！

心水一，好意頭果籃，呢間店好近果欄，保證生果新鮮，

網上果籃有好多選擇，價錢$330至$3350不等。

但要留意佢有D果籃會因事節隨時變動，

揀既時候唔好要梨、芒果同橙，因為個音似「離」、「亡」同「慘」。

心水二，花菜籃，係環保健康送禮新概念，呢個係最特別既！

而且菜類顏色好鮮豔、好靚，唔怕買三打生果食唔晒呢！

有時間既，可以自己試下DIY喇，真係排得好靚！

睇睇下先發現店主原來係葉蘊儀，價錢$850-$1780不等。

心水三，花藝果籃，除左鮮果外仲有花藝做裝飾。

呢份係包埋龍鳳餅同人參茶，價錢$1500。

因為係我過大禮前一日先準備果籃既事，

臨急抱佛腳，同時間競賽，好感恩揀左間花夾妥既果盤店幫手，

四點前落單，第二日9am-6pm就可以拎到手！

果籃本身冇喜字，拎左之後我再貼既，貼左之後成件事好喜慶呢！

雖然冇好霸氣既參茸海味同紅酒，但當晚都好順利完成最簡單完美既過大禮！

過大禮後，即係代表我地婚禮迫近喇，好緊張呀喂！！

About me

由一個不知b2b是什麼意思到發現解讀為Bride to be的普通blogger。

有關婚禮，DIY，美容，生活點滴既小分享。

不段成長學習中⋯⋯

Please follow

Esdlife Blog: http://wow.esdlife.com/space.php?uid=87788

Facebook: https://www.facebook.com/profile.php?id=100008389007016

Inbox for any enquiry!