♡囍♡ Vol.035 Wonkyu+ PW 過程經歷大公開

一直對韓國有偏愛既我，第一輯既PW諗都冇諗就要係韓國影，

其實我今年 9月已經影完返黎啦，但係一直都冇分享，

係因為我想經歷晒由揀到後期執相過程先話比大家知我既感受

上回有講到我揀左邊間studio（上回分享CLICK）

我諗有好多b2b對韓國影PW都好有興趣，

所以我寫呢篇分享文希望幫到大家解答我當時遇到既問題啦

疑團一：約見studio 或去婚展見面時要留意D咩呢？

1. 睇其他客人既效果相同現成既相簿

客人既效果相比較真實，另外相簿都分好多種，有啞身、令身，

要問清楚到時收既會唔會一樣。

2. 拍攝季節

去前記得已經plan 定邊個月份影，睇下會唔會就到季節花既時間，

櫻花、紅葉、落雪等等都係韓國必影既特式季節，香港影唔到架！

同埋預留至少半年前去影丫！

3. 室內場景問題

因為韓國update 場景都幾密，盡可能問佢地系列會唔會有 update，

如果你一年前訂既話，好多都會出左新版本，

有機會影個陣場景已經拆走。

4. 額外折扣

簽約前請傾好佢地額外會送咩比你，

好似介紹人會唔會多一晚住宿、現金折扣、送相簿等等

通常join agent 會有介紹人既優惠，只要一經介紹可以兩邊都有優惠，

婚展期間特別多wow友會上網召集一齊R 盡著數！

＊＊注意：婚展時留意佢地既facebook，

留電話比佢地，到場聯絡就可以帶有興趣既b2b入場。

如果撞唔正婚展期就要上佢地既工作室會面啦。

疑團二：當地既韓國藉攝影師係點架？

通常 join studio 既韓藉攝影師係一條龍服務，

佢地唔會有後期製作既修圖員，

即係邊個幫你影，就係邊個幫你做後期，

後期製作我覺得比較仔細，好著重美肌瘦身

其實我早期join 既時候以為係開呢間studio 既攝影師幫我地影，

後來先發現佢地係一team 人，

原來一間studio 係有好多位韓國藉既攝影師，

如果studio分好幾個系列，一位韓藉攝影師就會跟1-2個系列。

攝影師性格對成輯相好重要，有的性格比較有趣、也有嚴格的，

但係冇得揀指定要邊個既，所以都要睇彩數啦。

咁多數攝影師都nice nice 既。

攝影師同我地既溝通就係主要管理我地既表情同姿體動作

表情：大笑、微笑

動作：望對方、望鏡眼、望地下、望上面

高要求的會留意埋有冇高低膊、腳點擺、拎唔拎花球等等

疑團三：影出黎會唔會個個一樣好似倒模咁？100%同sample相一樣？

搵左一張sample相同我影出黎既效果相作比較

如果問係咪100%同場景一樣，我就覺得唔係，

以上面黎睇去玩捉錯處既話，

可以話大概90% 一樣，有D道具可能會小左D，

或者植物既盆會變左有「碌」方便移動咁。

但我都明白既，因為一日咁多組人影相，為左方便做野，

係要諗法子做到最方便而最有效率去拍攝為中心

而出到黎影響都唔算大。

其實攝影地點係一座大廈入面分左幾層、幾個場景，

因為所有道具同場景已經準備好晒，

唔需要點大執就已經同sample 相好似。

亦有人帶特式服裝去影令件事冇咁倒模，

韓國影PW可以保證感覺出黎同sample 相係一樣既。

疑團四：會唔會影得晒自己想要既野？可唔可以提出拍攝要求？

呢張相係開會時snapshot影的

除非自己加錢加頁數，其實入相簿的只有30張，

而影的場景一定唔只呢個數量，亦會都有可能唔夠時間影，

影之前係會同我地開一次會先，

呢個會就係想你話比佢聽你有邊D一定要影，邊D可以唔影，

又或者本身係黑白相，你想影彩色都要當時同佢提出！

唔係的話有機會就冇左彩色架喇。

另外都會問你鐘意自己左邊臉定右邊臉，

佢會盡量安排企位show到你自己最靚個邊臉。

疑團五：影幾耐？係咪好累？

預計攝影時間4個鐘左右，呢個時限係大概數字，

影唔晒佢地都要影埋既，

同埋影幾耐好因我地當時表現，

有時攝影師唔滿意會影多幾張，影到滿意為止，

有D 又一張就OK，所以影得耐唔係好事黎架。

累就一定喇，因為個人要keep住笑足半日，條腰要直，

有時要彎腰做高難度動作，爬高爬低亦少不免，

所以小D 體力都唔得，早一日要休息充兄丫！

疑團六：影邊個slots 最好？

簽左約後，佢地就會比幾段avalible 既時間比我地揀，

假日當然比較full，所以愈早book 既時間會愈好。

以我所知，佢地既slots 係10:30am-5:00pm，

但要留意你揀既slots 係攝影開始時間，

攝影前你要預留搭車化妝時間，大概4個鐘左右啦！

例如你係10:30影，就即係7:00你就起身架啦，搭車半個鐘，

7:30化妝，10:30到studio開始拍攝。

我覺得係12:00都幾 perfect，

因為太早又眼訓，太晏夜晚影相效果會唔好，

影之前又唔可以盡興，影完又天黑冇野玩。

疑團七：影完幾時有相睇？

呢樣係好抵讚，因為影完第二日就有相睇啦！

係用USB方式比相我地既！

岩晒心急既我！！

留意唔係間間會影完後既一日就比客的，所以join 前要問清楚丫！

疑團八：翻譯重唔重要？

雖然攝影師識小小英文同國語，但我覺得翻譯都好重要，

唯其是影相個陣因為個個人都好急，好多時講野都好快，

攝影師好想你聽到佢既指令，所以翻譯都好手快講出攝影師既要求，

如果冇左翻譯成個個程會慢左好多，同埋最好就係揀返廣東話，

同聲同氣嘛，哈哈！！

疑團九：studio入面係唔係得我地一對情侶影緊？

唔係，以我所知有一間星級studio 會一段時間只對一對情侶，

為左分鐘必爭，佢地安排好影完一層就走去另一層，

但如果有D 場景overtime 左，

有心理準備係會有其他同一日影既另一pair 出現！

疑團十：帶幾多套衫去影？帶備自己既飾物OK嗎？

snapshot影的

而佢地提供既婚紗配搭都係2件婚紗、1件晚裝同mini dress，

大家都知韓國既婚紗外套係好多好多，

多到真係一個景換一件外套，咁你就好似著左十幾條唔同既婚紗架喇

咁點解仲要2條呢？因為預你揀1條係散裙，1條係修身的，

千其唔好揀太相似既裙款丫，咁影出黎會太似

另外，佢地都會提供一對拖鞋款既高鞋比你，方便除同著。

除非自己想影便服或想帶有意義既道具，

其實去韓國影PW 可以話係咩都唔駛準備，最多係帶1套便服

佢地會係D舊既場景幫你影幾張。

而如果你自己準備左既衫、褲、鞋、飾物一早就要擺係架餐車上面，

因為架餐車會跟住你走既，其他行李會停係另一層，

所以有咩買左想當日用，記得要放係餐車度呀！

疑團十一：室內影出面落雨有冇事？

snapshot影的

雖然話係影室內咋，

但留意下自己studio d 影有冇陽台或者有窗口透光既位置，

當日萬一落雨，陽台景會影唔到，窗口位影出黎都會陰陰天，

所以唔想博，真係揀返唔係雨季會好 D。

疑團十二：加唔加錢外影好？

其實韓國外影都幾吸引，因為唔算好貴，

其實如果唔怕辛苦，我覺得同一日影係抵D 既，

同日就可以考慮係studio 附近影相，因為studio通常係集中係狎鷗亭附近，

個度其實有公園、花店、cafe等小清新地點影相，

當日我去outdoor 時都見唔少韓國人係公園影相。

一日外影都係為返$3500左右，

一日連化妝就大約$9000。

不過留意係冇鞋、西裝提供，mini dress可以借出去影，

但就冇姨姨幫手整頭換裙。

疑團十三：韓國化妝室係點架？

韓國出名化妝品又平又好，咁化妝室呢？

原來當地新娘、甚至韓星唔係請人出去幫佢地化妝，

而係佢地去化妝室化妝的，所以化妝室大部份一大清早就開門。

我個間studio 有兩間化妝室比我揀，

其實兩間比我覺感都唔係好大分別，

所以我揀左soonso，

去到即刻幫我地keep好行李後就幫我敷面膜，（男士冇得敷）

佢地分工都好仔細，總共4-5人幫過我

搽底妝同遮瑕係一個人，彩妝係另一個人，

夾頭髮係另一個人，頭髮造型又係另一個人。

而男士呢，就簡單為主，一個人化晒全妝：搽底妝、遮瑕、眉毛

頭髮造型就另一位髮型師set。

疑團十四：如果唔滿意個妝／頭點算？

如果唔滿意可以提出，佢地話對個妝有咩意見都要出聲，

但通常化妝師都有自己意見或未必做到你想要既效果，

所以都係自己帶備少量化妝品，男士就帶定gel 有需要時自己補救下。

疑團十五：萬能阿姨幫唔幫到手？

韓國姨姨幫手整裙中，snapshot影的

韓國姨姨係攝影過程會幫手著裙、set 頭同埋補粉補唇色。

姨姨真係好幫得手！好細心，

佢亦都準備左一盒唔同既飾品比我襯裙，

當換耳環既時候，會襯兩款比我揀，

佢亦會不時照顧埋新郎既bowie架！

但補粉同唇色就比較隨意，亦都會愈補愈乾，

所以我強烈建議都係帶 D野去保濕，

詳情可以回帶睇我之前分享過呢個好物 （CLICK）

疑團十六：駛唔駛買手信比攝影師？

其實呢樣係好隨心，

即係好似問香港影 PW你會唔會比利是一樣。

手信或利是都係心意一種，想比就比，唔比都唔會對你差，

因為佢地都係工作而且professional，

唔會話你比手信佢佢就幫你影得靚D。

不過如果影得累時，都可以買D野飲比佢地，

佢地都會好開心。

疑團十七：收到相後要點做？

收到相後第一轉要認真同另一半坐低一齊揀相！

真係要張張諗清楚，由其是係油畫個張，

唔好為左想快D要相簿而求其揀丫，因為揀左既相係唔可以再改架！

疑團十八：收到第一次修圖唔岩點算？

簽約之前留意清楚studio 係咪比你睇返修圖相先至開始印相簿，

因為我知道好多都係直接印唔會比你望下先，

不過我join 個間大概1-2 weeks 就收到佢地既基本修圖，

比我望完覺得邊 D修得太勁或唔夠再逐張逐張填表方式話佢知，

冇限話改幾多次，當中收相後會有deadline比我地，

咁就可以確保進度良好，

可以準時交貨。

疑團十九：對成個個程有咩意見可唔可以隨時反映？

係去韓國前，studio 會開一個whatsapp group chat，

有我地兩個、翻譯同香港兩位負責同事。

咁就可以隨時係當地約翻譯地點、時間，

或者whatsapp call都得，而studio 既香港同事非常有責任心，

好多野我講過都放係心，因為影相前一日落狗屎，

我地怕落雨有機會影唔到，香港同事怕我地唔開心，

盡量搵方法同其他方案去comfort 我地。

疑團二十：Studio、化妝室有冇得上網？

如果想隨時上網係要買wifi蛋或卡既，

除左化妝室有wifi 提供，我見studio 同試裙都冇wifi，

不過而加Wi-Fi蛋咁平，買黎去旅行比隨後幾日上到網都要啦！

有咩問題除時發問睇下我識唔識答～～

About me

由一個不知b2b是什麼意思到發現解讀為Bride to be的普通blogger。

有關婚禮，DIY，美容，生活點滴既小分享。

不段成長學習中⋯⋯

Please follow

Esdlife Blog: http://wow.esdlife.com/space.php?uid=87788

Facebook: https://www.facebook.com/profile.php?id=100008389007016

Inbox for any enquiry!