圓滿婚享 Ch.002・姊妹裙後記

之前姊妹裙篇blog好大回響（回顧CLICK）

有好多朋友問我姊妹裙整成點，完婚後係度答答大家啦！

因為我同伴娘差唔多size，所以我著左佢個條上身影相，

咁可以比大家睇我著上身既效果喇！

上身圖如上，睇完相，我再係下面再一一分item咁同你地review⋯

訂造裙店名：Glossy Berry

店舖地點★★★★★

尖沙咀百利，地點非常方便

店舖環境★★★☆☆ 

店內比較細，但可任試店內既裙及影相，如果一大班人去有機會要係出面等。

樓面工作只得一個人，多人時我覺得店主handle唔到咁多野，

所以訂裙都有唔少錯漏地方。

開放時間：★★★★☆ 

開放時間比較短，星期一會off，平日下午先開。

訂造時間★★★★☆ 

一般係2-3月前先會開始造裙，

但預計拎裙時間同婚期太接近，出事會更心急同憫，影響大家心情。

所以注意：當問你幾時婚期，我suggest大家講早一個月，

因為有咩事都有時間去補救。

價錢：★★★★☆ 

價錢係$380一條，另外10條以上係有優惠，

因為之前有另一位b2b一齊join，佢再平左比我地，所以我覺得價錢係吸引既。

布料質量：★★★☆☆

紗、chiffon、lace、緞都有，而佢地真係用任何布料都唔需要加錢，

而且有版比我揀顏色，可以伴娘一條唔同色。

講返我揀既lace + 緞，緞係質地我係滿意，但 lace既質地太軟，

唔夠挺身，而且好容易起毛粒，容易既程度係如果姊妹當日用斜咩袋，

用一個鐘應該已經玩完，所以我唔recommend 大家呢度揀lace做上身。

款式：★★★★☆

除左布料任揀，佢地款式都可以條條唔同而冇額外收費，

呢點抵讚，但事實出到黎既款式唔係好跟得足我要求。 

我諗好多人都睇中左我之前post入面粉紅色緞布個條裙，

我覺得裙既設計係特別，但我係冇訂到呢個款，因為我覺得條裙較顯胖，

布本身係厚，加上腰線較高，patpat以下就散開，

好易有大patpat，就因為我著起顯大patpat，

所以我當時用緞但要求下身做返冇呢款咁散同改摺裙車法。

度身★★★☆☆ 

揀完款後所有姊妹度晒身先可以造裙。 

我伴娘條裙著左上身，lace上身多左一舊出黎摺起左，

但我著起佢條裙我冇問題，個個人身型唔同，佢既紙版可能岩我未必岩佢，

所以我諗佢地度身應該度得唔夠足。

車工：★★☆☆☆

因為姊妹都係讀fashion，所以要求都比較高，

而摺既設計同原先我要求既完全唔同，

但店主話係一樣，所以我當時係有小小嬲架⋯⋯

左邊係我當初要求店主跟既摺款， 

中間係店主出貨後話跟左既摺款， 

右係最後出到黎既摺款。

除左摺既車法之外，我既製成品最大問題係有幾點：

1. 摺位斜（最出個兩條摺）

摺係斜既話就做唔到一條到底好似百摺裙既摺痕（中圖），

而且摺痕係要用車工用既熨斗，唔係普通熨斗可以做到。

2. 摺既分佈唔平均

最差個條大約有1-2”差距

3. 骨位傾前

有一、二條骨位有問題，條骨微微扭左向前，有機會係冇紙樣，

所有野都係隨性去車，當車左一邊既時候，

發現令一邊唔夠布強行再車會成幅扭左。

4. 車工馬虎

無可否認拉鏈、腰間、摺位都車得較差⋯⋯

改裙服務：★★☆☆☆ 

收貨後姊妹約上去再fit，佢地係包改，會一星期內會改好。

我知道我批裙有問題個陣有同店主傾，但當時撞正佢放假，

所以只有另一位幫我地follow。

好似我伴娘個條係腰位做長左，咁當然想改喇！

但店員話「唔駛咁fit，會唔方便做野」為理由唔改，

所以呢度係我係有小小失望，當時只能改既只有裙長。

而咁岩舖入面有其他客人試裙，佢地係改過腰位，

我睇得出條裙只係拆開左一邊黎改大細，

即係出到黎都係有唔balance既問題，

成條裙拉鏈會唔置中，偏埋左一邊，所以改裙既服務都屬一般喇！

最後，做新娘子要了解姊妹身型有高矮肥瘦，未必係個個一樣著到你既效果。

因為有b2b睇我之前分享既blog而心思思想去訂，

所以我覺得我有責任話返比大家知由我訂造到製成品既經過，

唔想大家因為信我share野一定係好或者跟我訂而最後覺得被水魚。

如果條裙要比分我覺得有65分，其實當日都好多朋友話姊妹裙靚，

而且有袋呢個設計真係好方便呢，姊妹都唔需要帶斜咩袋上身，

你問我覺得條裙唔算唔合格但可以更好，大家自己再參詳下喇！

About me

由一個不知b2b是什麼意思到發現解讀為Bride to be的普通blogger。

有關婚禮，DIY，美容，生活點滴既小分享。

不段成長學習中⋯⋯

Please follow

Esdlife Blog: http://wow.esdlife.com/space.php?uid=87788

Facebook: https://www.facebook.com/profile.php?id=100008389007016

Inbox for any enquiry!